Një rast i jashtëzakonshëm infektimi nga insektet e shtratit është zbuluar në qytetin Cardiff të Uellsit, ku miliona parazitë kishin pushtuar një banesë, duke u përhapur deri në mure dhe nën tapetat dekorative.
Sipas BBC Wales, specialisti i kontrollit të dëmtuesve Gareth Davies e ka përshkruar situatën si rastin më të rëndë që ka hasur gjatë 38 viteve të karrierës së tij.
Ngjarja është regjistruar në lagjen Canton të Cardiffit, ku ekipi i Davies u detyrua të përdorte pajisje të posaçme mbrojtëse për të hyrë në banesë dhe për të filluar pastrimin.
Eksperti tregoi për BBC Radio Wales se qindra mijëra insekte shfaqeshin sapo ngriheshin dyshekët. Ato kishin depërtuar edhe pas tapetave të mureve, duke e bërë ndërhyrjen jashtëzakonisht të vështirë.
Pamjet e publikuara tregojnë grumbuj insektesh që lëvizin në sipërfaqet e mobilieve dhe në pjesët e dëmtuara të mureve.
Për të përballuar situatën, specialistët përdorën fshesa profesionale dhe preparate të posaçme kundër insekteve. Dyshekët dhe kornizat e shtretërve ishin aq shumë të infektuar sa u desh të largoheshin për asgjësim përmes djegies.
Por rasti ka ngritur edhe një pyetje që mund të shqetësojë shumë familje: si mund të kuptohet nëse këto insekte janë futur në shtëpi?
Sipas Shërbimit Kombëtar Shëndetësor britanik, NHS, insektet e shtratit mund të transportohen përmes valixheve, rrobave dhe mobilieve të përdorura.
Ato zakonisht fshihen në dyshekë, korniza shtretërish, çarje mobiliesh dhe hapësira të ngushta pranë vendeve ku njerëzit flenë.
Shenjat më të zakonshme përfshijnë pickime që shkaktojnë kruajtje, njolla të vogla gjaku në çarçafë dhe pika të errëta në dyshekë ose mobilie.
Ekspertët këshillojnë që këto shenja të mos neglizhohen, pasi një infektim i vogël mund të përhapet dhe të bëhet shumë më i vështirë për t'u eliminuar.
Larja e rrobave dhe çarçafëve në temperatura të larta, tharja me nxehtësi dhe kontrollimi i kujdesshëm i bagazheve pas udhëtimeve janë ndër masat që mund të ndihmojnë.
Në rastet e përhapjes së madhe, zakonisht nevojitet ndërhyrje profesionale.
NHS thekson gjithashtu se prania e insekteve të shtratit nuk do të thotë domosdoshmërisht mungesë pastërtie. Ato mund të shfaqen edhe në banesa shumë të pastra.
Rasti në Cardiff tregon se sa larg mund të përhapet problemi kur insektet arrijnë të shumohen pa u zbuluar dhe trajtuar në kohë.
