Një alarm i pazakontë sigurie shkaktoi tension në Aeroportin e Nurembergut në Gjermani të martën, më 13 tetor, pasi një avion pasagjerësh që vinte nga Greqia transmetoi një sinjal që përdoret në rastet e rrëmbimit të avionëve.
Sipas gazetës gjermane BILD, autoritetet pezulluan përkohësisht operacionet në aeroport, ndërsa avionët luftarakë Eurofighter të Forcave Ajrore Gjermane u ngritën për të shoqëruar avionin drejt pistës.
Avioni i kompanisë Corendon Airlines, me numër fluturimi XR456, po udhëtonte nga ishulli grek i Korfuzit drejt Nurembergut.
Sipas agjencisë NEWS5 dhe gazetës Nordbayern, nga kabina e pilotëve ishte transmetuar kodi 7500, i cili në aviacionin ndërkombëtar përdoret për të sinjalizuar rrëmbimin e një avioni ose ndërhyrjen e paligjshme në fluturim.
Raportohet se për një periudhë ishte ndërprerë edhe komunikimi radiofonik me pilotët, çka nxiti reagimin e menjëhershëm të autoriteteve gjermane.
Avioni u ul në mënyrë të sigurt rreth orës 12:16, ndërsa në aeroport ishin pozicionuar njësi të shumta policore, zjarrfikës dhe pjesëtarë të forcave speciale SEK.
Pasagjerët u mbajtën përkohësisht brenda avionit derisa autoritetet përfunduan kontrollet e sigurisë.
Rreth orës 13:20, policia e Bavarisë njoftoi se kontrollet nuk kishin zbuluar ndonjë kërcënim dhe se situata ishte nën kontroll.
Sipas Associated Press, incidenti shkaktoi vonesa në gjashtë fluturime, ndërsa dy avionë që po afroheshin drejt Nurembergut u devijuan në aeroporte të tjera.
Ende nuk është sqaruar përse u transmetua kodi i rrëmbimit. Autoritetet po shqyrtojnë rrethanat, ndërsa mediat gjermane raportojnë se sinjale të tilla mund të aktivizohen edhe gabimisht.
Ngjarja ndodhi vetëm disa orë pasi tre pilotë kishin raportuar praninë e një objekti të dyshuar si dron në hapësirën ajrore pranë aeroportit.
Policia përdori edhe një helikopter për kërkimin e objektit, por nuk arriti ta lokalizonte.
Autoritetet nuk kanë konfirmuar ndonjë lidhje ndërmjet dy incidenteve.
