Punonjësit me të ardhura të larta në Gjermani duhet të përgatiten për kontribute më të mëdha sociale nga 1 janari 2027, pas një vendimi të miratuar të mërkurën nga kabineti federal.
Deutschlandfunk raporton se qeveria miratoi rritjen e të ashtuquajturës Beitragsbemessungsgrenze, kufiri maksimal i pagës mbi të cilin llogariten kontributet për sigurimet sociale.
Ndryshimi më i madh do të jetë te sigurimi shëndetësor publik.
Sipas Ministrisë Federale të Punës dhe Çështjeve Sociale, BMAS, kufiri mujor për sigurimin shëndetësor dhe atë të kujdesit afatgjatë do të rritet nga 5,812.50 euro në 2026 në 6,375 euro në 2027. Në nivel vjetor, kufiri rritet nga 69,750 në 76,500 euro.
Edhe kufiri për sigurimin pensional dhe atë të papunësisë do të ndryshojë. Ai do të rritet nga 8,450 në 8,850 euro në muaj, ose nga 101,400 në 106,200 euro në vit.
Për punonjësit që fitojnë mbi këto kufij, efekti do të ndihet drejtpërdrejt në pagën neto.
Deutschlandfunk raporton se një punonjës me të ardhura mbi kufijtë e rinj mund të përballet, nëse normat e kontributeve mbeten të pandryshuara, me një barrë shtesë prej afro 102 eurosh në muaj. Për personat pa fëmijë, shuma mund të jetë edhe më e lartë për shkak të kontributit shtesë për sigurimin e kujdesit.
Megjithatë, ndryshimi nuk prek shumicën e punonjësve në Gjermani. BMAS sqaron se rritja e kufijve prek vetëm personat me të ardhura mjaftueshëm të larta, ndërsa për pjesën dërrmuese të të siguruarve nuk ndryshon asgjë.
Qeveria argumenton se rritja lidhet me zhvillimin e pagave. Pagat bruto për punonjës në Gjermani u rritën me 4.38% gjatë vitit 2025, shifër mbi të cilën janë llogaritur parametrat e rinj për vitin 2027.
Për sigurimin shëndetësor ka edhe një ndryshim të jashtëzakonshëm. Përveç përshtatjes normale me pagat, kufiri do të rritet me 300 euro shtesë në muaj, si pjesë e masave për forcimin e financave të sistemit publik shëndetësor.
Vendimi i kabinetit nuk është ende hapi përfundimtar. Qeveria federale gjermane njofton se rregullorja duhet të marrë edhe miratimin e Bundesratit përpara se të hyjë në fuqi.
