Baltimore Ravens kanë transferuar Cam Jurgens nga Philadelphia Eagles, në një marrëveshje që ndryshon ndjeshëm vijën ofensive të të dy skuadrave.
Reuters raporton se Ravens marrin Jurgens dhe një zgjedhje të raundit të shtatë në Draftin 2027. Në këmbim, Eagles marrin një zgjedhje të raundit të pestë në 2027 dhe, më e rëndësishmja, një zgjedhje të raundit të dytë në Draftin 2028.
NFL.com konfirmon se marrëveshja është zyrtarizuar nga të dy klubet. Mediumi zyrtar i ligës thekson se 27-vjeçari largohet nga Philadelphia pasi regjistroi 62 paraqitje, 45 prej tyre si titullar, dhe u përzgjodh dy herë në Pro Bowl.
Jurgens ishte zgjedhur nga Eagles në raundin e dytë të Draftit 2022 dhe më vonë mori një nga detyrat më të vështira në Philadelphia: zëvendësimin e legjendës Jason Kelce në pozicionin e qendrës.
Faqja zyrtare e Baltimore Ravens shkruan se Jurgens u shndërrua shpejt në një prej lojtarëve më të vlerësuar në pozicionin e tij. Para sezonit 2025, Eagles i dhanë atij një kontratë të re katërvjeçare me vlerë 68 milionë dollarë, që e mban nën kontratë deri në vitin 2029.
Por sezoni aktual solli ndryshime. Pas dëmtimit të Landon Dickerson, Philadelphia e zhvendosi Jurgens nga qendra në left guard.
NBC Sports raportoi në shtator se Eagles vendosën ta kalonin Jurgens në këtë pozicion dhe t'ia besonin qendrën Drew Kendall. Eksperimenti nuk solli stabilitetin e pritur në vijën ofensive.
Baltimore, ndërkohë, kishte një nevojë urgjente pikërisht në qendër.
CBS Sports raporton se Ravens kishin humbur për shkak të dëmtimeve tre opsione në këtë pozicion, Danny Pinter, Jovaughn Gwyn dhe Ethan Pocic. Klubi ishte detyruar madje ta zhvendoste rishtarin Vega Ioane nga guard në center.
Sipas Reuters, Jurgens aktualisht ndodhet në protokollin e NFL-së për tronditje në tru, por pritet të jetë në dispozicion për debutimin me Baltimore javën e ardhshme kundër Cleveland Browns.
Transferimi vjen në një moment të trazuar për Eagles. NFL.com raporton se veterani Lane Johnson njoftoi po të mërkurën tërheqjen nga NFL pas 14 sezonesh, ndërsa Philadelphia tani humbet edhe Jurgens nga një repart që ka pësuar disa ndryshime.
Për Ravens, ndërkaq, marrëveshja sjell një dy herë Pro Bowler, vetëm 27 vjeç dhe nën kontratë deri në vitin 2029, në një nga pozicionet ku skuadra kishte nevojën më të madhe.
