BERLIN – Trazira te klubi i Bundesligës, 1. FC Union Berlin. Trajneri i ekipit U19, Jens Härtel, ka dhënë dorëheqjen pas akuzave për sjellje diskriminuese ndaj të rinjve gjatë procesit stërvitor.
Sipas agjencisë gjermane të lajmeve dpa dhe gazetës DIE ZEIT, 57-vjeçari vendosi të largohej pasi Komisioni i Kontrollit i Federatës Gjermane të Futbollit (DFB) kërkoi ndalimin e ushtrimit të profesionit të trajnerit për disa javë.
Gjithçka nisi me një letër anonime të dërguar në klub, ku ngriheshin pretendime për deklarata diskriminuese nga trajneri gjatë stërvitjeve.
Pas marrjes së letrës, drejtuesit e Union Berlin nisën një proces të brendshëm shqyrtimi, me përfshirjen e ekspertëve të jashtëm.
Në një deklaratë të publikuar në faqen zyrtare të klubit më 11 tetor, Härtel pranoi se kishte gabuar dhe kërkoi falje.
“Kam bërë gabime dhe nuk e kam përmbushur rolin tim si shembull për të rinjtë”, deklaroi trajneri gjerman.
Ai theksoi se nuk kishte pasur kurrë qëllim të lëndonte apo diskriminonte dikë përmes fjalëve të tij. Härtel njoftoi gjithashtu se do të tërhiqet përkohësisht nga profesioni i trajnerit për të reflektuar mbi sjelljen e tij dhe për të kërkuar mbështetje profesionale.
Drejtori përgjegjës për futbollin e të rinjve te Union Berlin, Lutz Munack, konfirmoi se klubi kishte marrë masa disiplinore ndaj trajnerit.
Sipas Munack, sjellja e Härtel ishte e papranueshme, por drejtuesit kishin vërejtur përpjekje të sinqerta nga ana e tij për të reflektuar dhe për të korrigjuar gabimet.
Klubi sqaroi se gjatë shqyrtimit nuk ishin identifikuar rreziqe për sigurinë e lojtarëve dhe se deri tani asnjë person i prekur drejtpërdrejt nuk ishte paraqitur pranë mekanizmave të raportimit.
Megjithatë, Union Berlin ka vendosur të forcojë programet e trajnimit dhe parandalimit të diskriminimit në akademinë e futbollit.
Härtel kishte marrë drejtimin e ekipit U19 vetëm në korrik 2026. Më parë, ai kishte drejtuar klube të njohura gjermane si 1. FC Magdeburg, Hansa Rostock, Eintracht Braunschweig dhe Erzgebirge Aue.
Largimi i tij lë vakant postin e trajnerit të të rinjve, ndërsa Union Berlin ende nuk ka njoftuar se kush do ta zëvendësojë.
