Delphine Horvilleur, një nga zërat më të njohur të judaizmit liberal në Francë, po tërheq vëmendje me një seri intervistash dhe librin e saj të ri, “Sermons sous les décombres”, ku reflekton mbi atë që ka ndryshuar që nga sulmi i Hamasit më 7 tetor 2023.
Në një intervistë për France Inter, Horvilleur tha se tre vitet e fundit e kanë detyruar të rishikojë jo vetëm mënyrën se si flet për Izraelin, por edhe mënyrën se si e sheh vuajtjen palestineze. Ajo tha se lufta ka ndryshuar gjuhën, diskursin publik dhe aftësinë e njerëzve për të dëgjuar njëri-tjetrin.
Horvilleur, e cila vazhdon ta përkufizojë veten si sioniste, ka qenë njëkohësisht shumë kritike ndaj qeverisë së Benjamin Netanyahut.
Në një intervistë të mëparshme për El País, ajo argumentoi se frika dhe trauma mund ta favorizojnë përsëri Netanyahun në zgjedhje, pasi ai mund të paraqitet si politikani që garanton sigurinë. Sipas saj, Izraeli duhet të jetë në gjendje të mbrohet, por pa humbur parimet etike.
Në intervistën e fundit për France Inter, Horvilleur foli edhe kundër logjikës që i detyron njerëzit të zgjedhin vetëm njërën palë.
Ajo tha se nuk dëshiron të marrë pjesë në demonstrata ku valëvitet vetëm një flamur, sepse për të vuajtja njerëzore nuk duhet parë sipas përkatësisë etnike apo kombëtare.
Tema është në qendër edhe të librit të saj të ri, i cili del në Francë më 8 tetor. Në një intervistë për Libération, Horvilleur paralajmëroi se zgjedhjet e ardhshme në Izrael mund të jenë vendimtare jo vetëm për të ardhmen politike të vendit, por edhe për marrëdhënien e tij me diasporën hebraike.
Horvilleur është gjithashtu e ftuar sonte në emisionin kulturor francez “La Grande Librairie”, ku do të prezantojë librin dhe reflektimet e saj mbi luftën, antisemitizmin, Izraelin dhe përgjegjësinë politike.
